പിഴലയിൽ നിന്ന് പൊതുസേവനത്തിലേക്ക്
എറണാകുളം ജില്ലയിലെ സുന്ദരമായ ദ്വീപ് പ്രദേശമായ പിഴലയിലാണ് ഞാൻ ജനിച്ചത്. കായലുകളും പച്ചപ്പും നിറഞ്ഞ പ്രകൃതിസൗന്ദര്യം നിറഞ്ഞ ആ നാട്ടിൽ വളർന്നത് എൻ്റെ ജീവിതത്തിന്റെ അടിസ്ഥാനം തന്നെയാണ്. ബാല്യകാലം സ്നേഹവും ലാളിത്യവും നിറഞ്ഞ ദിനങ്ങളായിരുന്നു. ഏഴാം ക്ലാസ് വരെയുള്ള വിദ്യാഭ്യാസം പിഴല സെന്റ് ഫ്രാൻസീസ് സ്കൂളിൽ ആയിരുന്നു. ഏഴാം ക്ലാസ് വരെ അവിടെ പഠിച്ചു. അധ്യാപകരുടെ സ്നേഹവും സുഹൃത്തുക്കളുടെ കൂട്ടായ്മയും ഇന്നും മനസിൽ നിറഞ്ഞു നിൽക്കുന്നു. തുടർന്ന് കൂനമ്മാവ് സെന്റ് ഫിലോമിനാസ് ഹൈസ്കൂളിൽ ചേർന്ന് ഹൈസ്കൂൾ വിദ്യാഭ്യാസം പൂർത്തിയാക്കി. ആ കാലഘട്ടത്തിൽ കടത്തുവഞ്ചിയിലും ബോട്ട് സർവീസിനേയും ബസിനേയും ആശ്രയിച്ചായിരുന്നു. യാത്ര , പുതിയ സുഹൃത്തുക്കൾ – ജീവിതത്തെ കൂടുതൽ വിശാലമായി കാണാൻ ആ കാലഘട്ടം എന്നെ സഹായിച്ചു.
ഹൈസ്കൂൾ കഴിഞ്ഞ് എറണാകുളത്ത് ഒരു പാരലൽ കോളേജിൽ ചേർന്നു. കേരളാ യൂണിവേഴ്സിറ്റിയിൽ നിന്നും ബികോം ഡിഗ്രി നേടി. അക്കൗണ്ടിങ്ങിനോടുള്ള താൽപര്യം അന്നേ വളർന്നു. പഠനം പൂർത്തിയാക്കിയ ശേഷം വൈറ്റിലയിലെ ഒരു ഓട്ടോമൊബൈൽ വർക്ക്ഷോപ്പിൽ ക്യാഷിയറായി ജോലി തുടങ്ങി. ആദ്യപാഠങ്ങൾ അവിടെ നിന്നാണ് പഠിച്ചത് – കൃത്യത, സമയപാലനം, ഉത്തരവാദിത്വബോധം.
പിന്നീട് എറണാകുളത്തെ ഒരു കമ്പനിയുടെ ബ്രാഞ്ചിൽ അസിസ്റ്റൻ്റ് അക്കൗണ്ടന്റായി ചേർന്നു. കമ്പ്യൂട്ടർ സംവിധാനത്തോടെയുള്ള ഓഫീസിൽ അക്കൗണ്ടിംഗ് മേഖലയിലെ പരിചയം വർദ്ധിച്ചു. ജീവിതത്തിൽ സ്ഥിരതയാർന്ന ഒരു വഴിത്തിരിവ് ഉണ്ടാകണമെന്ന് ആഗ്രഹിച്ചിരുന്ന സമയത്താണ് 1989 ആഗസ്റ്റിൽ കേരള റവന്യൂ ഡിപ്പാർട്ടുമെന്റിൽ ലോവർ ഡിവിഷൻ ക്ലാർക്കായി സർക്കാർ സേവനത്തിൽ പ്രവേശിക്കാൻ അവസരം ലഭിച്ചത്.
സർക്കാർ സേവനജീവിതം എൻ്റെ ജീവിതത്തിലെ ഏറ്റവും അഭിമാനകരമായ അധ്യായമാണ്. പാലക്കാട്, തൃശൂർ ജില്ലകളിലെ വിവിധ വില്ലേജ് ഓഫീസുകളിൽ ജോലി ചെയ്യാൻ അവസരം ലഭിച്ചു. ജനങ്ങളുമായി അടുത്തിടപഴകാൻ കഴിഞ്ഞു. അവരുടെ പ്രശ്നങ്ങൾ കേൾക്കുകയും പരിഹാരത്തിനായി പ്രവർത്തിക്കാനും സാധിച്ചു. ഒരു പൊതുസേവകനെന്ന നിലയിൽ മനുഷ്യരുടെ ജീവിതത്തിൽ ചെറിയൊരു മാറ്റമെങ്കിലും ഉണ്ടാക്കാൻ കഴിഞ്ഞതിൽ ഞാൻ സന്തോഷിക്കുന്നു.
സർക്കാർ ജീവിതത്തിലെ കൂടുതൽ കാലവും എറണാകുളത്ത് ആയിരുന്നു ചെലവഴിച്ചത്
ഫോർട്ടുകൊച്ചിയിലെ താലൂക്ക് ഓഫീസിൽ ജോലി ചെയ്ത സമയം വളരെ പ്രത്യേകമായിരുന്നു. വിനോദസഞ്ചാരകേന്ദ്രമായ ആ പ്രദേശം വിവിധ സംസ്കാരങ്ങളുടെ സംഗമഭൂമിയായിരുന്നു. അതുപോലെ മറ്റൊരു വിനോദസഞ്ചാരകേന്ദ്രമായ മൂന്നാറിലെ സർക്കാർ വക ക്വാർട്ടേഴ്സിൽ താമസിച്ചു ദേവികുളം സബ് കലക്ടർ ഓഫീസിൽ ആറുമാസം മൂന്നാർ ദൗത്യസംഘത്തിൽ പ്രവർത്തിക്കാനുള്ള അവസരവും ലഭിച്ചു. മലയോരപ്രദേശങ്ങളുടെ പ്രകൃതിസൗന്ദര്യവും പ്രതികൂല കാലാവസ്ഥയിലെ ജീവിതവും സേവനത്തിലെ വെല്ലുവിളികളും ജീവിതത്തെ കൂടുതൽ സമ്പന്നമാക്കി.
വർഷങ്ങളായുള്ള സേവനത്തിന് ശേഷം ഞാൻ വിരമിച്ചു. വിരമിക്കൽ ജീവിതത്തിന്റെ അവസാനം അല്ല, മറിച്ച് മറ്റൊരു ശാന്തമായ അധ്യായത്തിന്റെ തുടക്കമാണ്.
ജീവിതയാത്രയിൽ പഠിച്ച പ്രധാന പാഠം ഇതാണ് – പരിശ്രമം, സത്യസന്ധത, മനുഷ്യസ്നേഹം ഇവയാണ് മനുഷ്യനെ ഉയർത്തുന്നത്. പൊതുസേവനത്തിലൂടെ ഒരു അർത്ഥവത്തായ ജീവിതം നയിക്കാൻ കഴിഞ്ഞതിൽ ഞാൻ സർവേശ്വരനോട് നന്ദിയുള്ളവനാണ്.
